Considero un erro os ultimatums en política
Onte o Sr. Alcalde de Tui, D. Enrique Cabaleiro convocábanos a un Pleno Extraordinario e Urxente co obxecto de dirimir unha cuestión de confianza ligada aos orzamentos 2025. Isto ven dado, supostamente, polo feito de que o pasado día 24 de xuño a totalidade dos grupos da oposición rexeitamos dito proxecto orzamentario.
Certamente, o primeiro que hai que significar é que unha Sesión Plenaria ten un custe para o erario público e que deben economizarse as convocatorias na medida do posible, e este proceso será un derroche.
O segundo, resulta obvio, esta oposición en xeral, e eu en particular, levamos demostrado: 1) Educación e respecto institucional fronte ao que foi a oposición persecutoria e maledicente contra aquel goberno de Converxencia 21. 2) Consideración e benevolencia, tendo en conta algúns expedientes e patinazos significativos do PSOE, lembrando que o Sr. Padín foi levado a fiscalía repetidamente e linchado en redes e medios de comunicación de forma cruel. 3) Cooperación dentro dos límites da lóxica política por discrepancias de ideoloxías e programas, e neste aspecto, por exemplo, o Goberno de C21 sufriu un bloqueo constante, incluso para as asuntos mais nimios como o "Concurso de ideas para a fronte fluvial" (5 veces a Pleno), sen embargo, eu din paso as facturas por responsabilidade para que cobren os provedores e aprobei, por exemplo, o Orzamento de 2024, co cal non son sospeitoso de moverme con afán de bloqueo, todo o contrario, considero que estou actuando en aras de cooperar no futuro de Tui de forma limpa, construtiva, razoable, transparente e educada pero loxicamente baixo as regras que me ditan a miña conciencia e as miñas conviccións.
Con matices, o problema principal é que ao Partido Socialista cústalle moito gobernar en minoría porque ten dificultades para escoitar aos demais e sobre todo para introducir outros puntos de vista e medidas na súa acción de goberno. Isto comprobouse moi as claras cando na negociación destes orzamentos solicitei a supresión do Imposto de Plusvalía, inxusto e engorroso para o contribuínte, pero que en realidade ao Concello so lle significa retraer 19.000 € do capítulo de ingresos. O Sr. Alcalde nin sequera contestou ao requirimento, que viña acompañado de impulsar a execución de tres obras en San Caetano de Paramos, no Torreiro de Baldráns e en San Miguel de Pexegueiro, obras que tamén estaban contempladas no programa do PSOE. ¡Así de fácil llo puxen!
Ante a negativa de tódolos grupos a apoiar os orzamentos, ao día seguinte, chamei ao Sr. Alcalde e volvín a reiterar a miña oferta, e ademais, observando a apertura do Partido Popular a absterse nestes orzamentos, ofrecín a miña mediación; todo en aras de lograr un acordo.
A resposta foi este subterfuxio que é legal, pero politicamente pouco afortunado porque desestabiliza ao Concello, ofrece unha mala imaxe de Tui e que busca abocarnos a so dúas opcións: 1) A reedición do victimismo dos tempos de Sr. Padín en caso de que a oposición entre a trapo ca moción, pola miña banda "non será así", 2) Aprobar estes orzamentos sen negociar, con un decreto encuberto, negando a pluralidade saída das urnas, porque o PSOE sabe que o PP e o BNG non poden chegar a un acordo para propor a un candidato a Alcaldía e menos para formar coalición.
Sen embargo, como este ultimatum é un erro, eu sigo aberto a negociación e a mediación para evitar este despropósito. A miña oferta ao Sr. Cabaleiro mantense en pé, sendo sincera. En todo caso, ao mellor el mesmo podería deixar dentro do seu grupo esta tarefa a alguén con maiores aptitudes negociadoras.
